A Man's A Man For Aa That by Robert Burns (V)

Is there for honest poverty
That hings his heid an aa that?
The couard slave we pass him by,
We daur be puir for aa that
For aa that, an aa that
Our toils obscure an aa that
The rank is but the guinea-stamp
The man's the gowd for aa that


Whit though on hamely fare we dine
Wear hoddan gray an aa that?
Gie fules their silks an knaves their wine
A man's a man for aa that
For aa that, an aa that
Their tinsel show an aa that
The honest man though e'er sae puir
Is king o men for aa that


Ye see yon birkie caad a laird
Wha struts an stares an aa that
Though hunders worship at his word
He's but a cuif for aa that
For aa that, an aa that
His riband star an aa that
The man o independent mind
He looks an lauchs at aa that


A prince can mak a beltit knight
A marquis, duke an aa that
But an honest man's abune his might
Guid faith, he maunna faa that
For aa that, an aa that
Their dignities an aa that
The pith o sense an pride o worth
Are higher rank than aa that


Then lat us pray that come it may
As come it will for aa that
That sense an worth ower aa the earth
Sall bear the gree an aa that
For aa that, an aa that
It's comin yet for aa that
That man tae man the hale warl ower
Sall brithers be for aa that